D’fhógair Ollscoil na Gaillimhe uachtarán nua níos luaithe an mhí seo. Is é an tOllamh David J. Burn an 14ú huachtarán atá á cheapadh ar an Ollscoil.
Tá an tOllamh Burn ina Leas-Seansailéir Feidhmeach ar Dhámh na nEolaíochtaí Leighis, Ollscoil Newcastle ó 2017 i leith. Tá a théarma le tosú i mí Mheán Fómhair 2025.
Dúirt Burn go bhfuil nasc láidir pearsanta aige le hÉirinn le breis agus 35 bliain agus go bhfuil seantaithí aige ar a hoidhreacht shabhair agus a cultúr bríomhar.
Tá an t-uachtarán nua seo ina chúis chonspóide mar níl Gaeilge aige. Is é an chéad uachtarán gan Ghaeilge a ceapadh san aon ollscoil dhátheangach sa tír den chéad uair ó bunaíodh an stát.
Chuir an rialtas deireadh leis an oibleagáid reachtúil in 2017, a bhí ann ó 1926, go gcaithfidh sealbhóir oifige a bheith líofa agus inniúil chun a ndualgais a chomhlíonadh i nGaeilge.
Tá cruinniú práinneach iarrtha ag urlabhraí Gaeilge agus Gaeltachta Shinn Féin, Aengus Ó Snodaigh, le húdarás Ollscoil na Gaillimhe le stádas na Gaeilge san ollscoil a phlé.
Dúirt Ó Snodaigh “as na 19 n-institiúid ardoideachais sa stát, ní raibh ach coinníoll Gaeilge ag baint ach le ceann amháin acu. Agus é sin anois bainte, ní mór féachaint ar conas a shainmhíniú i gceart cad is ollscoil dhátheangach ann.”
Tá cáineadh déanta ar cheapadh an uachtaráin nua seo ag Conradh na Gaeilge freisin. Dúirt Conradh na Gaeilge, “Ba chóir don uachtarán nua gealltanas a thabhairt go bhfoghlaimeoidh sé Gaeilge, ionas gur féidir le pobal uile na hollscoile, go háirithe iad siúd ar na campais Ghaeltachta, cumarsáid a dhéanamh leis i nGaeilge.”
Tiocfaidh Burn i gcomharbacht ar an Ollamh Peter McHugh, a raibh an post aige ar bhonn eatramhach ar feadh beagnach bliain. Bhí an tOllamh Ciarán Ó hÓgartaigh ina huachtarán ar an ollscoil ó 2018.