Grianghraf: INPHO/Ben Brady
Beidh Corn Domhanda Rugbaí na mBan 2025 ag tosú sa Bhreatain an deireadh seachtaine seo, agus tá foireann na hÉireann réidh le filleadh ar an stáitse domhanda den chéad uair le hocht mbliana anuas. Beidh an chéad chluiche ag foireann Scott Bemand i gcoinne na Seapáine in Franklin’s Gardens, Northampton, Dé Domhnaigh ag 12 meán lae, agus tá súil acu tús dearfach a chur lena bhfeachtas i gCuid C.
Is bua mór ann féin é an fhíric go bhfuil Éire ar ais sa chomórtas. Chaill siad amach ar Chorn Domhanda 2022 tar éis laethanta tubaisteach in Parma, nuair a chloígh an Spáinn agus Albain iad. Tháinig athrú géar dá bharr sin ar rugbaí na mban in Éirinn. Tugadh isteach conarthaí gairmiúla, ceapadh cóitseálaithe nua, agus rinneadh infheistíocht níos mó sa struchtúr. Anois, tá Bemand i gceannas ar phainéal 32 imreoir, faoi na captaein Edel McMahon agus Sam Monaghan, le meascán de thaithí agus d’fhuinneamh ó imreoirí óga.
Ceann de na scéalta is suntasaí ná roghnú Beth Buttimer, húcálaí nach bhfuil aon chluiche idirnáisiúnta imeartha aici fós, ach a chuaigh go mór i bhfeidhm ar an lucht féachana i gcraobh an tsamhraidh faoi 20. Tá Ivana Kiripati, Nancy McGillivray agus Ellena Perry, a bhain a gcéad chaipín amach le linn na gcluichí téimh suas, san fhoireann chomh maith. Cuirfidh McGillivray, a rugadh in Hong Cong agus a bhí tráth ar liosta faire Shasana, iomaíocht bhreise i lár na páirce.