Cóilín Duffy
Cé nach mbeidh sí ag dul chun páirce Dé Domhnaigh, beidh Áine Keane ag croílár na socruithe d’fhoireann sinsir camógaíochta na Gaillimhe agus iad ag ullmhú chun aghaidh a thabhairt ar Chorcaigh i gcluiche ceannais chraobh shinsir Glen Dimplex na hÉireann sa chamógaíocht i bPáirc an Chrócaigh ag 5.15 pm.
Díreach roinnt seachtainí ó shin bhí Keane faoi scian le gortú ar a ballnasc croiseach tosaigh a tharla cúig nóiméad ó thús an chéad chluiche ag Gaillimh sa chraobh in aghaidh Bhaile Átha Cliath, buille cruálach don imreoir ó Chlub Naomh Tomás. Ach in ainneoin na céime ar gcúl, tá sí fós lántiomanta cabhrú leis an bhfoireann caoi ar bith ar féidir léi, fiú más ón taobhlíne é.
“Aisling gach imreora camógaíochta is ea a bheith sa seomra feistis i bPáirc an Chrócaigh lá chluiche ceannais uile-Éireann,” “Ní bheidh mé ar an bpáirc an uair seo, ach táim chomh bródúil céanna a bheith mar chuid de na hullmhúcháin agus den ghrúpa dochreidte seo.”